CLICK HERE FOR BLOGGER TEMPLATES AND MYSPACE LAYOUTS »

March 28, 2008

المابل سيرب


تحـــــديـــــث ==ه ==
بعد حالات الشغب والعفيسه اللي صارت
والدهس والدوس والتكفخ نتيجه التدافع الغير مسبوق
لووووول
اتمنى من كل المعجبين الهادين
واخواني البلوغرز الحلوين التوجه فورا
لاستراحه كبار الشخصيات ..استريحوا شوي
وشربوا عصير بارد على ما نفض الاشتباكات
وبعد قيام بربلوشه بتعيين نفسها مديره اعمالي من وراااااي!!و
وسرقة ختمي وتزوير توقيعي للاستفاده الشخصيه
والتوسط لبعض الناس وتطنيش الاخرين

وتهريب الماكولات لربعها


قررنا القرار الاااااااااتي

وهو

.

.

انه نثبتها في منصبها

!

لانها ببساطه
.
.
.
.

تموووووووووووووووون

:****

وبالنسبه لشريكتها كرموزه في الجريمه النكراء
وهي ترك عثماني بنص هدومه وسط الاوادم
عطيناها فرصه تدافع عن نفسها



الصراحة صاجه هالويه البرييييئ مو ويه مشاكل ابدا

الظاهر يا عثماني انك متوووووهّم
يتروااالك انها تلت هدومك بس الصحيح
انك تليت البنيه بهدومك



وهناك فرق طبعا
!!
بس منعا للاختناقات والتدافع وبعد فشل الجلب البوليسي في
تفريق الحريم عن عثماني


قررنا ناخذ باقوى الاسلحة الفتاكه

واكثرها فعاليه في تطشير الحريم
ونحذفه بالغلط على وحده منهم
وجنه ماندري
.
.
.
.
.
.



وفعلا تمت العمليه بنجاح


وطلع الولد من بين الجموع


بشويه خدوش ومن غير هدوم
:PPP
تفضل عثماني
تبي وزار محلي


والا وزار كندي زقرتي
:PP


المهم تستر نفسك ياخوي
على ما نودي دشداشتك وغترتك المصبغة الاكسربس
بس دير بالك لانه بعض الناس مش عاوزين يجيبوها البر
دييييييير بالك المره الياااااايه

بالبوست اليااااي


--------------------------------------------------------
المابل سيرب


أدري أدري اني طولت عليكم

ومعجبيني صاروا يفترشون الساحة المقابله لبلوقي

ينتظرون بوستاتي وهم يحملون صوري ولافتات تعبر عن محبتهم ولهفتهم

:P~

بس سامحوني والله انا من انشغل جد يصير وقتي مثل الطير

ما ينصاد الا بالتفق

!!

لووووول
طبعا جيل هالوقت ما يعرف يعني شنو تفق


لازم افسر

:\

معناته ما ينصاد الا بالمسدس او الفرد

هههههه


هذا الطير مو أنا


أنا أنصدت من زمان
;P


اول شيء مسويتلكم ريوق اليوم انما ايييييييه

تفضلوا




وهذي لقطة اقرب عشان بس اوريكم الفن
من صباح الله خير وانا عجله بالمطبخ

لووووووول


هذا فرنش توست مع الفواكه

وبالذات غرامي -البلوبيري- و

المابل سيرب

الصراحة انا داشه اكتب وما ادري عن شنو اكتب

بس لاني حسيت اني طولت عليكم وولهانه على معجبيني
بس الحين ياي على بالي اكتب لكم عن المابل سيرب

او
Maple Syrup


انا اسميه عسل الشير(الشجر)هاهاهاهاها
طبعا اول ما ييت كندا
كنت اشوفه بزجاجات تشوق
مثل هذي


بس من غبائي على بالي نوع من انواع الخمووووور

الحمدلله والشكر


وما اقرب منه بالسوبر ماركت
ولا اقرى شنو مكتوب على العبوه
غباااااااء مووو ؟
:p

مع انه نحطه على البان كيك في المطاعم
بس على بالي السيرب العادي
المهم بعد فتره عرفت وزرت بنفسي مزارع الميبل
وشفت اشلون ينتجونه

في اواخر الشتا وبدايه الربيع

وبالتحديد اسبوعين فقط بالسنه كلها

اهي الفتره اللي ينجمع فيها السائل من اشجار الميبل

ولازم درجة الحراره تكون مثاليه وتحت الماينس

بماادري جم درجه


اذا اكثر شوي او اقل

السائل ما يصب من الشير !

ولايمكن انه يتم بالشفط لاااازم على راحته ينزل نقطه نقطه لمدة اسبوعين



انا جربت اني اغرز الأداة الخاصة للاستخراج الميبل

وترى السالفة يبيلها فن

هههههههه

احم احم...

بعد ما يتم تجميع السائل في سطل خاص

يحطونه على النار يططططططططططططططططبخ لما يتركز
وعشان نحصل على جالون مابل سيرب

لازم يغلون اكثر من اربعيييين غالون من السائل
!!
وعشان جذيه ينباع بسعر غالي نسبيا مقارنة مع سعر العسل


الحلو بالموضوع انه الميبل تم اكتشافة بالصدفة من قبل السكان الاصليين

لما كان واحد منهم يصيد وانغرز الرمح بالشجره بدل الغزال فلاحظ انه نزل

سائل من الشير وتجمع في جربته اللي حاطها تحت الشيره

ولما صاد غزال وبغى يطبخة

على باله انه ماي عادي

بس طلع طعم الغزال احلى من كل مره يسوي فيها الطبخة

وكان هالاكتشاف الخطيييييير

طبعا القصة يمكن تكون مو دقيقة بس هذا اللي عرفته من الكنديين ربعي

الشاهد بالموضوع

اني ابي اسألكم هل ينباع المابل في اي مكان بالكويت

والا يسوى اييب منه صوايغ

:)))

لاني كل شيء شريته احس ما يعبر عن كندا

ودي احط شيء بالصوغة من وحي البلد نفسها

خاصة انه في عبوات ذربه

وطعمه لذيذ مع البان كيك والفرنش توست

آآآخر معلومه احب اقولها في بوستي الثقافي اليوم

:PP

انه اوراق شجر الميبل صار رمز لكندا

وسبحان الله شفت بعيني اشلون الاوراق في اووول الخريف

يصير لونها اححححححمر بشكل عجيب

احمر دم الغزال

وشكلها رووووعة

واهيه نفس الورقة المرسومه على العلم الكندي

واعتقد ما اختاروها الا لانها غير موجوده في مكان ثاني بالعالم

يعني حررررررره عندنا ثلج أبييييض وعندنا ورق الميبل الاحمر



وانتوا عندكم غباااااار احمر وأصفر

لوووووول


طبعا من عرفته وانا استخدمة ومره جربته

مع اللقيمات بدل الشييره

لووووول

بربسه مو ؟؟

:P

-------

وبهذا ينتهي تقرير اليوم

املين ان يكون قد حاز على اعجابكم

والحين صفوا دور للي يحب ياخذ توقيعي ويصور معاي

:PPPPP

130 comments:

Anonymous said...

تشرفت اني أحيي الميد واكون اول واحد يمسي مدري يصبح عليج

موضوعج غريب واول مرة اسمع عنة


مشكورة ورتبي وقتج تلاقين وقت إنشالة

مع إني أكبر فوضوي بس شسوي كل من يقولها لي وماصدقت على اللة اقولها حق احد


:)

Anonymous said...

halaaaaaaaaa ow ghallaaaaaaaaaaaaaah :D:D

shloooonaich sweety.....you really are such a sweety mo bas 7achi ya3ni :P

maple syrup...yaaaaaa salaaaaaaam


I and my family would define "maple syrup addicts" loooooooool :D

ma legeet mena fel kuwait ow sadgay maple syrup a7san soogha...bas 7ag eli mazajhom ow thoqhoom raqeeee

yebet 7ag wa7da min garaybee ow galat ley "eshda3wa 3alaich....yaybatli debes...shasawi fee..7ag elmawash wala sheno" looooool

on other hand....my cousin asked for maple syrup and specifically "MAPLE SYRUP TYPE B" 6la3at roooo7i 3ala ma legeetah...ow malegeetah ela bel mataar(airport) :/

la6aweleen algheebah 3alaina ba3d okay :)

Shaima'a Alkandari said...

يه يه يه


طولتى الغيبااااات ويبتي لنا المابل سيرب

الطبق شكله يشوق حيل وشكلي بروووح اتفلسف على اهلي واسوي نفسه وافنتك فيه

وشي يديد ترى اول مره اسمع عن المابل سيرب

وبعدين لاتصيفين علينا مره ثانيه

لان احنا خايفين عليج من
هالتجمعات والمظاهرات اللى صارت جبال بلوووقج انخاف لا اييووووووون الارهابيين ونبتلش

يبه خليج ويانا ولاتقاطعييييييييين

Selezya said...

لوووول جكجكجكججككجك احييج على هالثقافه لووول
والله خوش بوست ابي لما تردين تيبيلي منه ولا ترا بزعل :p

الله لا يوريج بالغبار اللي عندنا عجيييب يهبل يهبل لووووووول
انا الغبار اهو اللي خلاني اقعد بالبيت وافضى حق اللابتوب واكتب بوست يعني لو ماكو غبار جان انا للحين مطوله بغيبتي :p jk

سامحني عالقصور :*

5roofa said...

وناااااااااسه

امبي احنا لمه نروح امريكا ادمان بان كيك مع السيرب

كل يوم ارد من امريكا زايده ستين الف كيلوو بسبته لووول

بس يشووق الريوووق معنه ما احب الفاكه مع التوست

بس بالعافية ياارب و اشتقناااااااالك واللهييي

salamz sis....

joy said...

واااااااااااااااااو


كل هذا عشان يسوون ميبل سيرب
والله عباله

احنا نشتريه بارد امبرد
انا اشهد اه الفرش من المزارع نااااطع


اللا علمييني شلوون طلع مع اللقيمات ما جربته

وولهانيييييييييييييييييييييين

صقعت انا مع معجبينج من النطرة

الخيلاء said...

يشوق ..

لون الورقه غريب سبحان الله

احب المصانع و اصول الاشياء .. اتحسن وناسه خاصه اذا حاطين ادواتهم البدائيه و بعدين شلون تطوروا

فانكوفر .. انا ساطره بالدور ابي ميبل سيرب ما ابي توقيع :p

و عليج بالعافيه ..

Anonymous said...

مبروك عالستايل اليديد :)

قمت اسعبل

حسبي الله على ابليسج .. حدي يوعان

دورات الطبخ في الكويت تدخلج ذهب

لأن حريمنا خاملات :)

مو كلهم طبعا !

`~MnO YeNSa! ~` said...

الله
الله
بوسن ثقافي
حلو ..
بس الله يخذ بليسج
انا بالدوام وشفت البان كيك
مادري شصار فيني ..
فكرت استأذن والله

بس معلومات زوقة

وترى لج وحشة
فقدناج من غير شر

و عاد كلش ولا التفق :P

Barrak said...

انا صاف بالدور

ممكن توقعين على غترتي

Purplecious said...

فانكووووووووووووووفييييي

كاني يييييييتج برررررررررق

أبيييييييييه شنو هالبوست النااااااطع
:*********

و شنو هاللوك الأنطعععععع
:********

و ليش ما تتحجين ما تقولين انج منزله بوست؟؟ مريتج أنا بس من كثر ما انتي بدعتي بالغيبه الثلج غطى على البوست اليديد
كان لازم تحطين جرافات عشان نوخر الثلج للي من البوست اللي طاف عشان نشوف اليديد


أول شي تسلمممممم ايدج على هالفرنش توست انا ما شميت ريحته من الغبار يا وخيتي مو قلتيلي لبسي كمام
لبست و ما شميت عقبها شي
هههههههه

و لو اني بخرب الدايت اذا كليت بس دان انه فيه فواكهه ما عليه

فانكوووووفر
هذا المايبل سيرب جم كالوري فييييييه؟؟؟
بعذر انتي سمنانه اذا جذي ريوقج كل يوم
هههههههه
عليييييج بستيييين الف عافيه
:********

و مادري اذا ينباع بالكويت بشوف انا و جولي نروح نستكشفلج أفا عليج بس
:*

أهم شي انه حسبالج نوع من انواع الخمووور... لوووووووووول

فانكوفر البوست يونننننننننسسسسس
تدريت شنو حسيييت

حسيت اني قاعده اطالع كارتون قديم
أرنوبه و دبدوب جان تعرفينه
هههههههههه
مادري ليش بس اذكر كان فيه حلقه يروحون الغابه و يستخرجون العسل من الشير و يستخدمون نفس الاله اللي حاطتها بالصوره
لوووووول
ونااااااااسه

أنا اقول حق الصوغه يمعيلج جم ورقة مايبل حمر اللي ماكو منهم الا بكندا هاااا تذكار و بالكويت بروزيهم
ههههههه
وييبي معاج ثلج و خلاصنا بعد

ليش تشقلين البطوووول على قلبج؟؟
خوفج ربعنا يطلعون أغبى منج و يحسبونهم خموووووووور و يصادرونهم

لوووووووووووول

أنا ما أحتاج توقيعج لأني مديرة أعمالج
نتفاهم بالليموزين عقب ما تخلصين

هههههههههههههه

Hungry-Healthy-Happy said...

فانكوفر الحلوة أم الجدايل

شلووووووووووووووووونج؟؟؟

ليييش بربلوش تبوسينها اموااااه اموااااه وانا لأ؟؟؟
ترى أزعل!!!


ولهنا عليج و على سوالفج الحلوة والله

الـلـــــــــــه بعد اليوم صايرتلنا ديسكفري جنل
يه يه يه يه
أي هذي المواضيع السنعه الثقافيه

منها أنس و فرفشة و منها معلومتين يدشون هالراس اللي بدا يجيم من قلة الشغل

أمبي الريوق حدا يشوق مشالله
أبي أيييييج كنداااااااااااااااااااااااااااااااااااااااا


بس مابي أرد هني مرا ثانية
شبعي من هالبلوبري ترى هني قحط ماكووووو

هني حدج كشمش!!

ضروري نروح ندور هالميبل سيرب
عاد ييتيني بالوقت المناسب
هابه أسوي ذاك الحلو يا فانكوفر اللي يستاهل بؤك

ذاك اليوم ذوقتى بربلووووش
بغى يغمى عليها بمطبخ بيتنا فقيرة
لووووووول

ليتج قليلتلي عنه يوم إنني بأمريكا
علشان أجربه @@

عاد إذا ما لقينا منه بالكويت
نبي بطلين جنج ما تدرين

عثماني said...

اخيتي فانكوفر

انا اهني ..سامعتني !!؟

معجبينج قاعدين يدززون فيني .. آآآآي ... جنا بيربل داست ريلي

يبة كل هذا علشان توقيعج ؟؟ ما لازم ..هونا

لحظة .. مادري منو تل غترتي

charisma said...

واخييرااااااااااااا
بووووووووووووووووووست
علقتينا على بااابج

وااقف على على بااابكم ولهاان ومسير
هههههههههه

ان شااءالله تكونين بالف خير

افااا تتشمتيين فينا يا فانكووفر

افاااا يا ذالعلم يا فانكوووفر

الله يسامحج

والله انعمينا بهالغبره سكتااى الله يعيينااا

بنقزرها الصيفيه كلها غبار يقولج

://

الحمدالله على كل حاال

اما عن البوست فااا شوقتييينييييييييي
غراامى البانكيييك احبا وااايد

مس مانى قادره اتخيل الطعم

لالالازم اذووق احب الشيره انا

:))

بس مع لقيمات ما يندرا يا فانكوفر شمخبصه يا اوخيتى

ههههههههههه

اناا اقول ييباى وبيعى عندنا

لان مو موجوود ما سمعت عنه

البوست فادنى شخصيااا

وااايد استفدت وتعلمت شى يديد

:**

حافظج الله قلبى

Najmah said...

الللله

انتي خطيييييرة

صج اشتقنااااالج
:*


والستايل اليديد وايد حلوو :)

حدي احب البان كيك
عزمينا شدعوه ;)

Anonymous said...

دخلت مدونتج مرة ثانية

وتمقلت بالصور عدل شفت صورة الشيرة(الشجرة)
وهي يطلعون منها المابل

ذكرني بشجرة المطاط
والمطاط ذكرني بمسرحية باي باي لندن
ومقطع (سبكهاوة مع الماطاطو ونوقع العقدو داخلو) الله يرحمها مريم الغضبان

عشان جذي نبي الموضوع الياي عن الماطاطو

وسلامتج وتعيشين

mowa6en said...

الموضوع شهي جدا جدا جدا
نطالب بالمزيد من الخلطات

Purplecious said...

لوووووووول عثماني

سوووووووري ما شفتك
ههههههههههه


فانكوفر

طرى على بالي سؤال

الحين المايبل سيرب هو اللي اسمه


شراب القيقب؟؟؟


لوووووووووووووووووووووووووووول


أقولج شايفته باباي قديم
صدقيـــــــني

هههههههههههه
هههههههه

charisma said...

عن اذنج فانكووفرغغغ اكو رياال يتميلح هنى بالبلوق اسمه عثمانى

عثمانى

هذى انا كريزما الى تلت غترتك

بيربل داست ريلك وانااا الى تلييت الغتره

واحمد ربك يت على الغتره

وبعديين البقاء للاقوى طال عمرك

ولى تيمعنا انا وبيربل عند باااب فانكووفغغغغغ انت اتوسع لنااا
احنا بالمقدمه
لييدز فيرست

بعديين لا اتحووس وايد نبى بووست
:/


بيربللل
قام يداحر الاخ
:/
وسلامتكم
مع السلامه

Kuwait said...

رووووووووووووعه الموضووووع ..
حده عجبنيييييييييي..
ابي صوووووغه ترى سواء اكو مثله بالكويت او لا مالي شغل و ابييييي توقيعج وابي اصور ويااااج مممممممم واذا تذكرت بعد شي ناسيته برجع..
لا تطولييين علينا الغيبااااااات عشان ما يصير جذي زحمه عند الباب ولا زحمة الخباز أيام الغزو ..
لوووووووووووول
تقبلي مروري ..
kuwait

صقر قريش said...

فانكوفر:

مابي أطلع غبي بس والله اول ماشفت اول صوره للسيرب عبالي بطل ويسكي (بالي رايح بعيد مو تفكير عزوبية الله يعين) لكن والله شهيتيني للمابل سيرب هذا لازم اجربه واذا ماطلع بالكويت بيي عندكم ترانزيت وىخذه معاي وإذا بتيبينه صوغه لاتسيني معاج :) (حدي راز ويهي ) طبعا ريلج هو الي يعطيني عشان لو فجاة والكويت صغيره وطلع يعرفني يخصني بكل السيرب الي معاكم خو شغل واسطات (بس خليني اتذكر منو من الي اعرفهم رايح كندا لوووول حدي مصدق ) عليكم بألف عافية يصير ادرس عندكم (بس حطيت السيرب في بالي :) )

عثماني said...

فانكوفر ...اشفيهم معجبينج دفاشة !!؟

بيربل هانم و طنط كاريزما وحدة تدوس ريلي و الثانية تلت غترتي

لا .. و طنط كاريزما تقول احمد ربك يت على الغترة ...!!! يعني شتبي تسحب يعني !!؟

مو انا لازم افهم ...انا داش بلوق ..و الا راكب اوتوبيس في شبرة !!؟

ما سوت علي هالدشة

لحظة ...لحظة ....وين دشداشتي !!؟

عييييب يا ناس ...ابي دشداشتي

استروا علية ربنا يستر عليكوا

:)

someone_q8 said...

السلام عليكم
مشكورة اختي على هذا الشرح الجميل واللي خلاني ايوووووع اكثر واكثر لاني مو متعشي , لكن يالله مرة ثانية اذا بدش البلوق لازم معدتي تكون مليانه
قواج الله في هالغربة والله يعينكم ويحفظكم من كل شر

بنت الكويت said...

شلونج فانكوفر
ما بغينا نشوف بوست يديد

طبعا السيرب هنييه احسه شي اساسي عندهم

وعلى كلامج يعني هذا وقت استخراجه من الشير

ورحله بنتي باجر راح تكوون هناااك
حسافه لو ادري جان سجلت اسمي ورحت معاهم

بس معلومة حلوة
يعطيج العافية

ولد الديرة said...

فانكوفر

منزل مبارك

شوفي يا اخيتي

انتي قلتي ان السائل ينحط بسطل

بالكويت ما عندنا سطل

عندنا تبوب

فحدنا ثوم يبل

اتريقين توست و فواكه
!

و ريلج ما انحاش؟

والله فدائي

اذا ما صار الريوق درابيل و رهش و اليوم اللي وراه لبنة و زعتر واليوم اللي وراه بيض مع طماط والا ام العيال تزور بيتهم مبجر

:P

Purplecious said...

وسسسسسسسسسسسع وسسسسسسسسسسسع

كريزما حبيبتي امشي معاااااي هني تعالي انا أدخلج المقصووووووره
احنااااااا
VIP
يا عيوووني
و بما اني مديرة اعمالها أدخل اللي ابي

اش لنا بالطوابير و الزحمه و اللويه و المداحر

لالالالالالا و يطلعلج بعد
goodie bag
فيه تشكيله من أحسن انواع شراب القيقب
اللي هو
المايبل سيرب
هههههههههههههههههههههههه


عثمااااااني
و بعدييييييين يعني ترى ابتلشنا فييييك
بسك مداحر خلاص روووووح جبله شمقعدك هني؟؟
لحظه لحظه

كريزما رديله غترته خل يستر عمره الريال... دبر عمرك عثماني أدري الغتره ما تيزّي بس العوض و لا القطيعه

فانكوووووووووووووفر

الله يعافيج اذا عندج وزاااااار كندي مني مناك قللييييه علينا قبل لا يستبرد عثماني... مالنا خلق يطيح علينا مريض نبتلش فيه بعد

charisma said...

ههههههههههههههههه
يا صبااح الفل على الحباايب
والله اصبحت وييت طاايره هنى
:)))

بيبربل يا بعد جبد جبد جبد جبدى انتى
وياااابعد من قااام وقعد
شفتى شلون شلخنى هالعثمانى ولالالا يقولى طنط !!!

انااااااااا طنط

اخخ بسس اخ

والله يا بيربل انج طيبتى خاطرى ونقذتينى منا

الحمدالله ان احنا VIP

ولالا جااان اعلوووم

عثمانيييي

وبعديين تليت الغتره بالغلط شدرانى عنك انت بعد ادفييش عثمانى شمقلقصك بين الحرمه هااا الاغلب بنات
اى روح طابور الشباب يه غير سالفه هذى


كانى يا بيربل ييتج خلنا نرتقى وندش المقصوره حتى ما يخلون الواحد يتواضع
:/

بيربل شبى فى غترته مو عندى تليتها بالغلط بس ما خذيتها بيدى
شبى فييهاااا

لووووووووووووووول
خل يستر عمره بالوزار الكندى شعلى انا
هههههههههههههههه

واى بربييل وااى مت ضحك
لوووووووووووووووووول
شراب القيقب
كااااااااااااااااااااك
ذبحتينى
هههههههههههههه

فانكوفر نحتاج ردج
طلى علينا بطلتج البهيه الى تشرح الصدر

:**

وصباحكم قيقوبى

Anonymous said...

ماني مسلم عليج

الصراحه مصختيها لا تطولين الغيبه علينا اللي فينا كافينا

من زود الوله يا وخيتي

من حبك لاشاك

الله يردج بالسلامه

Hungry-Healthy-Happy said...

LOOOOOOOOOOOOOOOOOOOOOOOL

لووووووووووووووووول

أنا نوعي قاعدة من بعيييييييييييد
و حاطتلي طاسة البوبكورن
و أتطمش على الهوشة و المدازز و المداحر
و آكل

خبركم ما أواااطن الزحمة
لاااا و فيها تتلل غتر و دشاديش
و تدووس على الريووووول!!!

لا يبا أقعد أراقب لأنني أدري أخرتها
فانكوفر حبيبتي بتدخلني
من الباب الوراني


إإإإإئئئئئئئئئويييييييييييييييييي

سدرة العشـــاق said...

انا عندي لج راي ليش ما تيبين و اتبيعين ؟

علي الدعاية بس توكلي على الله و عايني خير

سبحان الله لون الورقة حلو تبارك الرحمن

مشكورة على هالبوست العجيب

عثماني said...

انزين عطوني جوتيي .. برد بيتنا هونت
ما سوى علي هالاوتوغراف

طنط كاريزما ... انا واقف بطابور الرياييل .. ما وعيت الا و موجة حريم ياية صوبي .. انا شسوي يعني !!؟

حريمنا دفاشة ..شنسوي بعد

وانتي بسج تدوس بريلي .. بيربل

هرستيها الله يهديج

الله يهديكم .. انتوا الى متى ما اتسنعون و تعرفون توقفون بالطوابير !!؟
ها ؟؟ الى متى يعني !!؟

شوفوا الحريم في كندا و اوروبا .. هناك طابور واحد .. رياييل و حريم .. و عادي .. لا يدوسون اريول .. ولا يسحبون اغتر

ماكو الا اخيتي جولي .. السنعة ..شوفوها قاعدة من بعيد و اتطمش

الله يسلمج وين الباب الوراني .. وابي الله يعافيج قرشة شراب القيقب .. يقولون زين حق القولون

الا راعية البيت وينها ؟؟

ARTFUL said...

انا مابي توقيعج لما نذوق

نبي بان كييييك مع عسل الشير الاصلي من كندا

تالي نحكم

اسم الله عليج كليتينا بالحجي شوي شوي

;p

J Daily said...
This comment has been removed by the author.
darkness said...

مبروك النيو لوك

اتوقع انتي مسويته

صح؟

و مشكوووووووره وايد وايد على المعلومات الثقافيه اليديده

:)

و بالنسبه لسؤالج فما ادري

بس المهم انج تردين بالسلامه

:)

Q8DOLL said...

خليتني ابلع ريجي ألف مره
امبيه شحلات البان كيك واهو غرقااااان لشوشتو بعسل الشير
والله موضوعج يشوق ومعلومات حلوه وغريبه !!
هالشيره مادري العسل له قصه بعد؟
نبي قصه الكنار الله يعافيج مره ثانيه
بالعافيه
ويابخته ريلج فيج
الله يديم المحبه بينكم

صقر قريش said...

اي ده هوا في حرب ولا أيه ياساتر الحمدلك والشكر يارب اني مش طرف بالحرب دنا غلبان أوي والله دنا فئير على باب الله انا ماليش دعوه ياخوانا شوفوا لي حل مش عاوز انضرب عشان ماركدش لمامتي وانا أعيض سترك يارب :)روحي يا أختي فانكوفر ربنا ينصرك :) ماتسيش السيرب انا مستنيه :)ونسيت ائول الف مبروك على اللوك الجديد ده هو يجنن أوي أوي والله ربنا يخليكِ عظمة على عظمة ياست :)

Hungry-Healthy-Happy said...
This comment has been removed by the author.
Hungry-Healthy-Happy said...

LOOOOOOOOOOOOOOOOOOOOOOOOO
OOOOOOOOOOOOOOOOOOOOOOOOOO
OOOOOOOOOOOOOOOOOOOOOOOOOO
OOOOOOOOOOOOOOOOOOOOOOOOOO
OOOOOOOOOOOOOOOOOOOOOOOOOOL

واي فانكوفر
عســـــــــــــــــــــــلو الله العظيم إنتي عســــــل

لووووووووووووووووووووووووووووول

بروحي قاعدة أضحك بالمكتب من صباح الله خير
جني هبله

لووووووووووووووووووووووووووول



لووووووووووووووول

vancouver said...

حسااااااااااافتج يا كويت
حيييييييت الميد ماشاءالله اوووول واحد
لوووول
صباح الخير ومساءالانوار
العفو
احلى شيء ارتب وقتي
:(
اشلووووووون
الحياة من غير خدم ترى حدها صعبه
صدقني
بالذات انه مسكين زوجي الدراسه مو مخليته هالأشهر يقدر يساعدني مثل اول
كلللللللللللل شييييييء على راااااسي
بروحي
:\
الحمدلله على كل حال
منوووووووووووور بحضورك
ولك جائزه حي الميييد
:)))

vancouver said...

غشييييييمه
هلا بحبيبه قلبي
:***
اشلوووووونج مع نسمااااات الربيييييع المنعششششششه
:)))
حبيبتي انا الحمدلله زينه ونحول
ههههههه
طيبه واتمنى تكونين بخير

حلو يعني انتي فاااهمنتي
دام انكم مدمنين المايبل سيرب
:)
لذيييييييييذ صح ؟

والله افكر اخذ منه لو عبوات صغيره
واحطه مع كل صوغة
احسه شيء حلو بس خووووفج
يطلعلي احد مثل صاحبتج يحلييييييلها


اللي ما يعرف الصقر يشوييه
مسكيييييينه بتحطه مع المموش
لووووول
انتزين اهوه حاااالي مو حاااامض
شكو دبس
؟
ههههههه


ماشاءالله على الذويييق
يبيه بعد تايب بي
؟؟؟
لالا انا ماوصلت الى درجة اني
واااايد افرق بالطعم بين الفاتح
والاغمق والغامق كلش
اعتقد كل ما زاداللون زاد التركيز والحلاة
بس الصراحة انا ما يفرق عندي


اتصدقين ودي بعد اجرب الكاندي
اللي على شكل ورقة الميبل
ومصنوعة منه
ماااجربتها
:|
تعتقدين حلوه
؟



ان شاءالله احااااااااااااول اني ما اطول عليكم

vancouver said...

شيووومه الكندري
اييييييييه شفتي اشلون يبا

عاد ان شاءالله المره اليايه اذا طولت
بنزل سحووووووبات على رنج روفرز
لوووووووول

ايه روحي فنتقي على اهلج
ترى التوسسسست لذيييذ لما يتغمس بالبيض والحليب ويتقلى
وااايد حلو

خلاااااص من يوم ورايح
كل التجمعات بنرشهااااا
ب
ب
ب
بمااااااااي الورد والزعفران
كله ولا معجبيني
:))
حياج الله

vancouver said...

سيليزيا

شكرااااااا على التشجيع والمؤازره
شنسوي بعد لاااازم نثقف دول العالم الثااالث
:PPPP

والله تكسرون الخاااطر
كل ما اكلم الاهل يقولون غبااار
الله يعينكم

بس على الاقل رديتي لنا
وهذا الاهم
حياااااج الله مره ثانيه

:***

vancouver said...

خرووووووفة
هههههه
اي واكيد تطيحوله في اي هوب
و
دينيس
صح ؟؟؟
وترجعون الكويت زايدين
وهدومكم ضيجه
ههههه
الله يعافييييييييج
وتشتااااقلج العافيه
:***

vancouver said...

جوي

اييييه والله
انا بعد ما زرت المزارع قمت
اقدر كل قطره من السيرب
هههههه
والله تدرين اللقيمات داايما اطيب
مع شيره الزعفران والهيل
بس لما انزنأت رشيت عليها السيرب
وكان طعما حلو
بس مو لقييييييماتنا التقليديه
بس نااايس


والله انا ولهااااااانه اكثر
بس شسوي
وقتي مو بايدي واااايد مشغووله
سوووووري صقعتكم
بس من يووووووووم ورااااايح
الدنيا ربيييييع
والجو بديييييييييييييييع
:))

vancouver said...

الخيلاااااء
شفتي سبحان الله الالوان
كانت زيارتي للمزرعة واااااايد حلوه
وفعلا استمتعت بمعرفتي

افا
يعني توقيعي كلش ما تبينه
ولا صووووره
ما هقييييييتج بطينيه
لووووول

حياج الله

vancouver said...

محسد

الله يبارك فيك ياخوي

لووووووول
تسعبل مره وحده
لوووول

والله الكل يقولي من صجهم
ألفيلج كتب طبخ
لاني قمت اسوي فناتق
بس لا لا كلش مومجالي

حيااااااك الله

vancouver said...

منو ينسى

ونااااااااسه
يعني عجبج البوست
اشووووووه
كنت اخاف يكون ممل بالقراءه
لووووووووول
اي اي انا نفسي وانا انزل الصوره
نفسي هفتني عليييييييه
وانا كل جم يوم اسويه
هههههه


والله انتي اللي زوقة
وما تفقدين غالي
وسامحوني على التقصير
بس والله مو بايدي

vancouver said...

براك

اي دوووووووووووور
انا ييت والا شاشوف
هوااااااش
ونجره ومخامط
بس عشااااانك
راح اوقع
على يبهتك بحبر دائم
عشان ما تنساني
لووووول

ما تبي صووووووره
افا
:\\

vancouver said...

بربلوووووووووووووووشتي
:******

حبيبتي انتي القمر ويايتني بسرعة البرق
بعد قلبي
ذوقج اللي ناااطع
:*
عجبج اللوك
كله اتذكر كلااامج لما قلتيلي غيريييه
وماغيرته بشيء جذري
الحيييييين قبلته فوووووق حدر
ربيييع ربييييييييييييع يا بيربل
الجو الحمدلله صار روعة عندنا
:)

لوووووووووول
مره ثانيه انشر بالجرايد
لما انزل بوست
ههههه
سامحيني كل ما اقول بكتب شيء
انشششششششششششششغل
:\

لا والله الكالوري اللي فيه
ولا شيء يم المطبق والمجاااابيس
والبلاوي الزرقة
ههههههه
كفايه الكاكااااااو والايس كريم
دمااااااار يا بربل
الله يعااااافيج

تونسج العافيه
:)

هههههههه
ارنووووووبه ودبدووووووب

تدرين عاد اني فعلا يمعت ورق الشير الاحمر
وكنت بخشه للذكرى وببروزه
بس عقب يومين تغير لووووووونه
ما قدر اوصل لطريقه
اني اجفف الورقة بس احافظ على حمااارها
دايما تقلب وتصير بنيه مع الوقت
:\

ممكن
صاجة
ويفشلووووووني جدام خلق الله بالمطار
فانكوفر يااااااايبه خمور
بس عادي اقولهم
للاستهلاك الشخصيي
ويمشووووني
ترى ثلث ارباعهم يسووون جذيه
اللي يتصادر بس الاستخدام التجاري
:pp


خلاااااااص ثبتناج بالمنصب اللي رزيتي عمرج فيه
لووووووول
يا احلى مديره اعمال بالدنيا

يالله روحي ييبيلي قهوه
وتحالي حكّي جتفي
وخري قذلتي عن وييهي
مو مديره اعماااااالي
ان ما كرررررررفتج كرااااف
لووووووول
عشان تحللين الراتب اللي تاخذينه
:)

vancouver said...

جوووووووووووووولي

لا لا مااااااصدق
خل احك عيوني مره ثااانيه

يا هلا بالطش والرش
وماي الورد بالغرش

اسفرت وانووووووورت
واستهلتتتتتتتتت واغبرت

لوووووول
بعد ما اقدر اقول مطرت عندكم
حدكم الغبااار
لووووول
اكبببببببببببببببر بووووووووووووسه
حق جوووووووولي
:*******
بوسه العيايز اللي يشفطون مو بس يبوسووون
لوووووووول

اهم شيء اثقفكم يا دول العالم الثالث
علشان على ما ارجع الكويت
الا في نخبه من مستوااااي
اقدر اتحجى معاهم
لووووووووووول

---

...منها أنس وفرفششششششه
لحظه
أنس عرفته ولد عمتي
بس فرفشه منو تطلع
ملاااااااااااااااااااااقه
لوووول


حياااااااج الله
تشييييييلج العين ان ماشالج المكان
يا جولي
اي والله صاجة
انا اهنيه اللي مونسني
بالتسوق
اني اشرّي بهالاشياء اللي ما تلقينها عندنا
وبالذااات انواع التوت
الفريش
والخضره الفرييييييش

لووووووووووول
حدي كشمش
لا حرام ظلمتي ديرتنا


فيها
مشمش
بعد
!
زياااده في الملاقه
لوووووول

فناااانه يا جولي
بس امااااانه تذوقيني اياه لما ارجع ان شاءالله


حااااااااضرين
غاليه والطلب رخيص
بطلين بس
الا عشر
بس انتي عن اي بطوووووووووول
تتكلمين
حددي لو سمحتي اكثر
!!
:PP

vancouver said...

عثمااااااااني

لا لا مو شافتك
اسمعك بس ماني قادره اشوووووووفك
اش هالأمه اللي حواليييييك

مو جنهم حدوني ولازقين فيك
شالساااااااالفة
؟؟؟

مزيووووووووووون بعد ما ينلامون
لوووووول

vancouver said...

كرموووووووووووووزتي
البرييييييييييييييئه
ام النظرات السااااااااهيه
;)

سامحييييييييني والله اني بطيت عليكم
والله مشغووووووله
الحمدلله انا بخير


لا لا لا ما عاش اللي يتشمت
فيكم
انا اضحك عليكم بس
!
لوووووووول


الله يعينكم قالولي الاهل
انه متنبئين هالسنه
الصييييييييف كله بيكون غبااار
الحمدلله يبا غبار
ولا اعاصير وزلازل
الحمدلله


من عيووووووني
جان بخت تزوريني
واذوقج ايااااااااه
عاد كندا حذفه عصا
بس
:\

كل من يقولي بيعي
منه
هههههههه

اخاف يصير فيني
مثل ما صار بحسينوه وسعد
لما دخلوه التجاااااره
:\

حبيبتي
وااااايد استانست انج استفدتي
عيل البوست الياي
عن تشريح جسم الانسان
مع التطبيق
لووووووووووووووووول


حبيبتي
:****

vancouver said...

نجمه
حيااااااااج الله
نجومه

تشتااااقلج العافيه
:*****
حلت دنياج
اشوه يعني اعجبج التخبيص اللي خبصته
بالستايل اليديد
:)

افا عليييييييج
طقي طيارتج وتعالي
وانا اعزمج كل يووووم
:)

vancouver said...

حسااااافتج يا كويت

حياك الله مره ثانيه وثالثة وعااااشره

لوووووول
سبكهاااوااا
الله يرحمها برحمته


ام...ام..؟تبي موضوع عن المطاط
؟
عيل لازم اسافر افريقيا
وساعاتها بنزل بوست كل 6 اشهر ونص
اشراااااااايك
؟؟؟

:))


_--------------------------_





مواطن

حياك الله
حاظرييييييييييين للطيبين

الموضوع الياي اذا عن الكب كيب
بس مو مسؤوووله عن اي اضرااار
:))



_-------------------------------_





بربلووووووشتي

الله يازيييييييييييين اللي حضرت
:)

والله والله يبتييييييها ييب يا بيربل
ترى انا والله ما كنت اعرف اسمه بالعربي
بس لما قريت سؤالج
جوجلت الموضوع بالعربي
وفعلاااااااا
طلع اهوه
شرااااااااااااب القيييييقببب
لوووول
اش هالاسم العجيب
يمكن لو كنت عارفه اسمه بالعربي
جان ما جربته
لووووول
جنه شراب القبقب
وييع

صاااااااااااجه
والله قاعدة اتذكره
مار علي بالباباااي
صاجه

ولج جائزه
الذاكره البحثيه
لووووول
مبروووووووك

vancouver said...

كرمووووووووزتي

لوووووووووووول
ريااااال يتميلح منو
اللي واقف بمكسّر وفانيله نص جم
بس
لوووووووول


اول مره اشوووووفج
متوحشششششششششششه
لووووول
الظاهر من عقب اللي شفتيه من مسؤولج الخبل
بو الزفت
انفجرت قنبله صبرج
وافتلتي
لوووول


لووول
واحلى شيء لا تحوس وايد نبي بوووووووست
لووول
بعد عطيه طرااااااق
هاهاهاهاهاها

خنت حيلي الريال
صار كتكووووت يتيم
بينكم يالحريم
لوووووول

اهم شيء التشيش
حق بيربل
اهم شيء
هههههه

vancouver said...

كويت

طلتج الاروووووووووع
حاضرين صوووووغة واوتوغراف وصوره

وفوقهم بووووووووووسه
:***

ههههههه
زحمه الخباز بالغزو شفتها بعيني
بس محد تل اهدوم احد
اهني بالبلوغرز
بهذلوا بعض
كل عشااااااااااااني
لوووووول

vancouver said...

صقر قريش

لا والله منت غبي
اناااااااا الغبيه
اللي شفت البطول على ارفف الجمعيات
وعلى بالي خموووووور
مع انه الخمور ما يحطونها بين الاكل
دايما لها قسم خااااص
:\

السؤال المهم واللي يطرح نفسه
وين انت شايف بطل الويسكي عشان تشبه عليه
لووووووول
؟

أفا عليك كرتوووووووووون ويسكي
قصدي سييييييرب
حق صقر بروووووحه
هههههه
الله يعافيك
حياااااااك الله
تعال ادرس
واااااايد كويتين اهنيه
وبيفرحون اذا زادوا واحد
:)

vancouver said...

عثماااااااااني
لوووووووووووول
اي والله عيييييييب ياناس عطوووووه الريال دشداشته
شنو؟
بتاخذونها ذكرى
:PPPP


ترى انا احاجيك وانا مغمضةعيوني
حيااااااااااااااااءً مني
:P
لووووول
حقك علي ياخوي
تعال اهنيه على جنب
بس خل افهمك


عثماني
الله يهديك
انت بعد ماادري
اشفييييييك
يعني حبكت تييب ريولك وتحطها
تحت كعب بيربل عشان تدوسها
وتاخذ غترتك تحطها بايد كاريزما
اللي مووووووووووو طنطك
واتل راااسك عشان تنتل معاها ايدالبنيه
اشوي اشوي
الله يهديك

انت مزيون ادري
وخوش ولد
وعلى هالطاري
متى بتتزوووووووووووووج
؟؟؟؟؟

نبي نفرح فيك وبشبابك وعيالك
والعمر يررررركض وانا اخيتك
:P
اشفييييييك مشيت وعطيتني مقفااااك

قااااعده احاجيييييك انا

تعااااااال وين رايح
متى بتتزوج
؟

لووووول

vancouver said...

someone_q8

وعليكم السلام والرحمه
اسسسسسسسسسفة اني يوعتك
لو بايدي احط مع البوست
سامبل للتذوق جان ما تاخرت
الله يقويك ويسلمك على دعائك الطيب
امييين
عرفت الحين الغمنده
مره ثانيه قبل ما تقرى بوستاتي
تعشششششى
ههههه

vancouver said...

بنت الكوييييييييييييييييييييت
:*******
لا لا ما ني مصدقة
حبيبتي
ولهاااااااااانين عليج والله
وطلتج ولا القمر
وييييييينج ووين سوااااليفج الحلوه
؟؟
لج وحشه والله
الله يعافي الميبل سيرب اللي ياااااااااابج
:)))

لا وقت استخراجه اظن بس اوائل مارس
بس يدفى الجو شيء
خلاص بح
:)
انا رحت مع الجامعة
وناااااااسه
والحلو انه المزارع تكون احيانا على مرتفعاات
والاشجار داااااااير مدايرج
صج غاااااااابه

الله يعافيج
وبلييييييز
رجعيلنا
حتى لو باسم يديد
بس عاد قوليلي
بالسر انج بنت الكويت
لووووول

vancouver said...

يا جماعة الخييييييييييير


سامحوني


فاصل

وسنواصل ان شاءالله غدا

:))))

تصبيره
تفضلوا
http://pro.corbis.com/images/42-18715008.jpg?size=572&uid=%7B9C807872-F88E-4634-A4AC-735FFAC495D7%7D

SolaimaN said...

وييييييييييييييه يا سليمان الحجي وايد، فشله

s:

اول شي اللوك نـــــــــــــــار

وبعدين هالسيرب لو اييبه البيت يقيمون علي الحد

علبالهم ولدهم طاح بالخرابيط ، لان اي قرشه

تدخل البيت لازم تكون يا فيمتو والا لقاح الجسر

وما سواه يعتبر شحاطه زايدة

any way ,,shawgteni wayed 3la ha9owar

and pls tc to othmani maystahel

:)

فتى الجبل said...

ماحب دومينوز بيتزا
وحتى لو احبها فالزهيوي لوع جبدي لأنه الشي الوحيد اللي يخرعني بهالدنيا مع ابرة الطبيب

ARTFUL said...

لا مو قبول

تيوعينا تالي تروحين

الحين شصبرنا لي الغدا

ماكو شي مصبرني غير ان الغدا مطبق زبيدي الوالده الله يطول لنا عمرها

يا جماعة الخير يا أهل الكويت ((أهل كندا خل يصكون أذانيهم)) ترا الزبيدي الكويتي نزل السوق حرام تفوتون هالأيام بالبرغر وهالخرابيط

مع عشقي للمجابيس والعيوش الا اني احاول كثر ما اقدر اتجنبهم للمحافظة على الصحه

بس اليوم ((ناهيييي وألف ناهيي)) هذا ودمتم

;p

العاصي said...

قاعدة بكندا و تدورين عسل
يا خلاف علينا و حنا عندنا العسل طحيحة و نبي نبيذ

esTeKaNa said...

واي عيزت وانا اكركر في بداية البوست
ههههههههههههههه
اهم شي افترشنا الساحات
اي والله افترشنا
يختج معجبينج وايد
انا مفترشه وياهم وفارشه لي ذيج المده وادور بجاي وقهوة يختج انا المعجبة السنعه ما شفتيني
:pP~
الوزار زووووووووووقه
وريته ابوي قاعد يمي
قالي هذا بربريز؟
ههههههههههههههههههه

بالنهاية
حرام عليج انا يعت وانا اشوف البان كيك وهللريوق اللذيذ
خوش تقرير
وخوش بوست
وسعيت صدورنا
:**

Snow White said...

الله يا حلات البان كيك والفواكه مع المابل سيرب عجيبه شوقتيني ومشكوره على المعلومات المفيده بصراحه أول مره أعرف أن المابل سيرب يطلعونه من شجرة الميبل بكندا

الله يوفقكم إن شاء الله وترجعون بالسلامة :)

الخيلاء said...

فانكوفر

والله كنت ابي توقيعج

و صورتج و اصور معاج

بس يوم شفت الذبح المذابح

هونت

قلت اخاف يفرقونا بقنابل دخانيه

و مسيله للدموع

و اتصير هجت

و انا ماعندي وانيت

فكتفيت بالميبل سيرب

على الاقل اسمل على رويلاتي و عويناتي

صار مكافخ

لوول

وردة حب said...

الريووق لذيييييييذ

بس ورا هالصراصير وين الواحد له خلق ياكل

مرسييييييييييييييييييييييييييييييية ياعسل

5roofa said...

هاااي ام دم عسل

بغيت اسال اذا عادي اخذ ايميل عشان بسوي تغير بسيط ي بلوقي و ودي اضيفج في قراء البلوق؟

سالفه طويلة لول اقولها بعدين بس اذا عادي و مافيها ازعاج عااديي؟؟؟

salamz sis...

عبثي said...
This comment has been removed by the author.
DiLLi O MiLLi said...

لاااااا صـــج !؟
@@

وأنا عبالي يتصنع من عدة اشياء
اثاري يطلعونه من الشير !؟ سبحان الله
يحليلهم
عجيييييبه المعلومة هذي
مشكوووورة نورتينااااا

بس تدرين انا ما احبة
انا احط عسل مع البانكيك او الوافلز

حتى لوو هوو موجوود بالكويت
يبي صوايغج منه .. لأنج يايبتة من امه
:)
احنا رحنا روما يبنا البلسامك وزيت الزيتون صوايغ مع انها متوفرة بالكويت
بس لا ياتج من الأصل اتصير أنطع
:)



ههههههههههههه

أشهااالصكه والغبره اللي عندج
تبييين أستدعي القوات الخاصة !؟
جم قنبلة صوت على قنابل مُسيلة الدموع
أتخليهم يتراكضوون لبلوقاتهم

:)

Unknown said...

vancouver ana '3ramey shay esmah el french toast bs ya5tej ma3aref asaweeh :Pp elmagadeer wala 3alaij amer

Q80 Blogger said...

حتى اهني دومينووووز @@

خوش بوست بس خرب علي هل دومينوز

يعني فتره امتحانات وبكندا .. مو بس لاعت جبدنا منه .. قمت اسب الي يقولي خل نطلب منه :)


المابيل سيرب
والله مثل قصتي
عبالي مشروووب روحاااني
هههه

بس والله سبحان الله .. يوم رحت شفت المصنع .. شي غريب
الشير ينقط اشوي اشوي
وآخر شي تارس مطاطييير الدنيا

اعرف واحد من ربعي كل مارد الكويت ياخذ معاه كميه حق الأهل
بس انا ولا عمري فكرت آخذ معاي !!
احس شي عادي .. مادري انه شي غريب يعني ومو موجود بالكويت !!!!

اذا صج مو موجود .. حتى انا هل رده بخمط منه :)


وبالنسبه للأوراق .. اهو مو تحدي
بس تعالي صوبنا .. الساحل الشرقي
يقوولوون .. والعهده على الراوي .. اكثر مدينه في تلون شير بالعالم اهي مدينتنا !!
بنفسجي واحمر واصفر واخضر
سبحان الله

بس عاد أكره كل هل ألوان
لأنها اعلان مبكر بالزمهرير القادم
أول مايبدي يختفي اللون الاخضر
يعني يا ويييلكم يا سواااد ليلكم
ياكم البررررررد


بوست جميل ومميز كالعاده
تحياتي للساحل الغربي :)

Q80 Blogger said...

وتره هذا الوزار الكندي نفسه الي استخدمناه حق السنو مان :)

Eng_Q8 said...

خوش مديرة اعمال

Anonymous said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Home Broker, I hope you enjoy. The address is http://home-broker-brasil.blogspot.com. A hug.

vancouver said...

سااااااااااااامحوني
تاخرت عليكم

بسم الله نبدأ
:)


_-------------------_



ولد الديييييره

الله يبارك بعمرك
عقباااالك
نبيك تغير اللوك بعد
تزامنا مع الربيع
:))
صج انك بطيني
اول شيء الفرنش توست مغمممممس ببيض وحليب
ثانيا الحمدلله زوجي وااايد يحب الاكل الصحي والخفيف
تصدق اذا سويتله ريوق فول مثلا
ما يتغدا
هههههه
مو مثل بعض الناس
:p
بسميك
بوكرشه
هههههه
حيااااااك الله

_-------------------------------_





بربلوووووووووشتي
مديره اعماااالي
يااحلا مديره اعمال
ام الوااااسطات انتي
!
حلوه هذي
توزعين قودي باجز
وانا ااااااخر من يعلللللم
!!
حراااااااااااااام عليج
كلللش ولا عثماني
عين السيح
تطردين معجبيني
بربلوشه
؟؟؟؟

ومع هذا مثبتينج مثبتينج
ولي حبتك عيني



مااااااااااااا ضامك الدهر
:))

vancouver said...

كرمووووووووووووزتي
ياااااااا صباح الورد والزهور
وتغريد الطيور

صباح القيقب
كاريزما!

يقول المثل
ربع(ن) تعاوني
مااااااااااا ذلوّا

اشوفج مطبقته عدل ويا بربلوشه
تعاونتوا على المسكيييين
ما سوت عليه فقيييير
هذا عثماني الطيب
جذيه تشلخووووووونه
هههههههه
؟
لوووووووووووووووول
فطستيييييييني من الضحك
على سالفة
ما يخلون الوااااحد يتوااااضع
لووووووووووووووووووول

امووووووت انا على التواضع والمتواضعييييين
سلم قلبها كرموزه المتواضعة
ما عطوها فرصه
هههههههه
تفضلي يبا حياج في مقصوره كبار الشخصيات
ان ما فتحناها حق كرموزه
حق منو بالله نفتحها
:)))

vancouver said...

الانونميس
ساااااااااااامحوني والله
ادري طولت
مصاخة بس شسوي
سلّم سلّم بعيونك الحلوه
لوووووووووووووول
ليش يبا ما تسلم
؟



_------------------------------_




جوووووووووووووووووولي
صباح القيقب على الحلوين
:)

لحظه لحظه
شنو قاعدة من بعيد
وتطالعين الهواش
؟

لا يبا تشااااااااااااركين بالهواش
والنجره يعني تشااااركين
لازم تثبتين اعجابج لي
بشمخ على خدج والا كمشه شعر
كل ما زادت الشموخ
يعني تحبيني اكثر
لوووول

لووووووووول

vancouver said...

سدرررررررره العشاق

ابيع
؟
لا يبا عساني اشيل بطول الصوايغ
ترى عندنا قش وااااايد
الا صرت الوكيله الحصريه بالكويت
والخليج
جان زين
:)

تخيلي الوان الاوراق
على الطبيعة
شيء خيااالي
سبحان الله
حيااااااج الله

_--------------------------_



عثماااااااااااااااني

اول شيء امسحها بويهي ياخوي
ترى طلتك عزيزه وغاليه
بس شسوي
مديييييييره اعمالي
تقمصت شخصيتي بالمداحر
واختارتك انت الضحيه
رقم وااااحد
هههههه

موووووووووتني ضحك يا عثماني
الله يغربل ابليييييسك
حتى جوتييك فصخوك اياه
لووووووووووووووووووووول
ماسوت عليك بوست
هههه

بربل مصره تهرس ريييييلك
تقول تبي تطلع عصير قيقب محلي
ههههه

بعدين كاريزما طنط
حراااااااام عليك
هالورده طنط
مدمووووووزيل كريزما
تقول انك انت تليت ايدها بغترك
:\\\
يووووووووووز يا عثماني
مره ثانيه شوف وين تحط غترتك
:)

حياااااااك الله
انت من كبار كباااااار الشخصيات
عندي
جم عثماني اكو
؟
ولا يهمك
اطلبك
مابل فرابوشينو
بس استريح
الا اشرااااايك بالوزار الكندي
اخترته بربريز وردي
عشان يتناسب مع لون حواجبك
لووووووووووووووووووووووول

vancouver said...

ارتفول

حيااااااااااك الله
اتفضل زورنا بكندا وانت تذوق مالذ وطاب من عسل الاشجار :)
بالشاشة مالك الا النظر والتسعبل على الصور
لوووووول


_--------------------------------_






جاره القمر
اهلين يا عسسسسسل
الله يبارك فيج
الصراحة لا
جاهز
بس انا اضفت الصور وبعض اللمسااااات
:))
الله يسلمج من كل شر
_------------------------------_



كويت دول

حبيبتي
تعالي زوريني وانا اسويلج احلى بان كيك يا عسل
قصة الكنار الله يسلمج تلقينها في بلوغ جبله
ولا
ام الهيمان مو ببلوغ فانكوفر
;PP

امييييييين بعد قلبي
وهالله هالله بصووووووتج
ترى امانه
((كلش مو ناقصة انتي عوار راس ))
الله يعيييييينج


_-------------------------------_





صقر قريش
هههههههههههههههههه
هاو هاو اشفيك قلبت من صقر قريش
الى
عبدالسلام النابلسي
لوووول
يا خف طينتك وانته تتكلم فرعوني
هههههه
ادري كل هالمدح يعني
تبي شيء
جم عندك وزن زايد بالمطار وتبينا نمشلك اياه
:PPPPP

vancouver said...

جووووووولي


اذا انا عسل
انتي ميبل
:PPP

حبيبتي
سعييييييييييييييده انا برسم الضحكه على ويهج من صباح الله خيير

عساها دوووووووووووم

:)))))))


_-------------------------_






سلييييييمان

حياااك الله
بس اشرايك بتوارد الخوااااااطر
والزيارات المتبادله بنننننننننننفس اللحظه هههههه

شكرا شكرا
:)

لووووووووووووول حطه في بطل بيبسي
فاضي
ههههه


اي والله عثماني مااااااايستاهل
بس تبي الصج
اهوه اللي بدا ينبّر
والا شكو يتحرش في شيخاتنا بيربل وكرموزه
مسكيييييييييييين ماسوت علييه
هههههههه
منووووووووووور
يا سليمان ونبي بوووووووست يديد


_--------------------------------_





فتى الجبل
الحين هديت الريوق والمايبل
وشفت الدومينوز بس
:)

اكوووووووووووووو ريال كويتي يخترع من الزهيوي
ماااااا اصدق
!!!!!




_------------------------------_






ارتفول

هههههههههه
اااااسفة يبا حطيتلكم تصبيره بالكومنت الاخير قبل الغطه
ما شفته
؟؟

الله يخليلك الوالده ويحفظها
وعلييييك بالعافيه المطبق
بس على فكره
ترى حتى اهني بكندا نااااكل زبيدي
مستورد ومفرزن
اش على باااااااااالك يبا
هههههههه
؟؟

vancouver said...

عاصي

اسمك عاصي وتدور نبيذ
اعوووووووووووذ بالله
لا يبا خلك في لكك الحرام
!
وخلنا في عسلنا الحلال
:)


_--------------------------------_





استكاااااااانه
حيالله من يانا
:))

كركره العافيه ان شاءالله
انتي امممممممممممم السنع والمنع
اي اي عرفتج
من ذقت ذاك الجاي المخدر عرفت انه استكانه قريييييييبه
اي اي بربريز ياحليله ابوج
ذرب ويعرف الذرابه
ههههههههه

حيااااااااااج الله

:))

_--------------------------------_







سنو وايت

حياج الله
العفو وانا سعيده انه المعلومات عجبتج
:))

اميييييييييييين
ومنوره بزيارتج العسل
:)


_-----------------------------_





الخيلااااء

شفتي اشلون كان البوست هاااااادي
وراااااايق
حولوها مذبحة
لوووووول
كله من الولد الشقي عصمااااني
هههههه

بس افا عليج انتي تدخلين من بوابه كبار الشخصيات
اشلج بالعجأه
والمكااااااااافخ

لا يبا انتي غير
مو مال هواش كلش
:))))


_-----------------------------_






ورده حب

لووول
لا يبا انسي انج شفتي صرصور
هذا مو لكبار الشخصيات
هذا لمثيرين الشغب بس
هههههه


_-------------------------------_







خروفتي لا لا ماكو اي ماااااانع حبيبتي
ان شاءالله ادزلج ايميلي
عسى ما انسى بس
شنو التغيرات
يعني بس بتخلينه لكبااااار الشخصيات والمدعويييييين ههههه
؟


_------------------------------_






عبثي

شكرااااا

Aldenya said...

ياحيالله يا بوالوجه الصبوحي
ابو الوجه الصبوحي
يا حيالله

هذي ترحيبة لج وعلى ييتج وعلى كتابتج لهالبوست

والظاهر مزاجج فصلي
هذا كان بعز البرد

وهذا ربيعي

يعني باجر بتكتبين عن الصيف

وعشان جذي عليج غرامة

انج تييبين شيرة مابل سيرب لكل واحد رد عليج

اوكي يا معلمه

Anonymous said...

looooooooooooooooool

لااا يا خلاااف انا وين و الاكبارية وين و ان مدرسه

انا تره سويت التغيرات اذا بتدزينه دزي على ايميلي تلقينه موجود في صفحة
el profile

salamz sis...

الخيلاء said...

يا بعد من قام و قعد

:)

ماقصرتي يوم انج بتدخليني من باب كبار الصخصيات..

ما احب العجاه

و يبيبلج معاي
مرقوق
عشان يرم عضمج
عن هالبرد السحتني
الي عندكم

بروح اشحن كامرتي
الديجيتال
عشان اصور معاج
و يصدقون البلوقرز
اني شفتج

و عفيه عقب بروح رحله حق مزارع المابل سيرب
بشتري حق طبختي
عشان يصير طعمها غير مالوف
:p

mantovani said...

ماشالله

شنو هاللوك الحلو

يبا احنا نبي نعرف من وين

اتييبين هالباك غرواند الطيب

مانتوفاني

صقر قريش said...

اختي فانكوفر:

آنا ما أصير عبدالسلام النابلسي الا لما أصارخ :بغمممممممممممم :)لكن طالما اكتشفتي اني أبي شي ابيج بواسطة قوية منج تخليني اهرب سواق جارنا متاذي من معزبه ويبي يهج وين يلاقي احسن من كندا فبحطه بالجنطة وازرقه عن طريق ربعي بالكويت وعندكم عاد تكملون الباجي (لابالله رحتوا وطي).

بوتشخيص said...

مبرووووووووووووك على اللوووك :) عجييب

فراوله said...

مساالورد والجوري
غاليتي الحبيبه
حدي ولهت علييييييييييج
وحشتيني موووووووووووت
بس صج صمنا وفطرنا علي بوست يشرح الصدر
هههههه هههههه ههههه
صج فطستيني من الضحك
مسكين عثماني "الفلته" عاد والله مايستاهل
وكروزه الامووره
صج ويه برييء
الله يسعدها آمين
:)
حبيبتي انتي
الله لايحرمنا منج آمين
:**

enter-q8 said...

يا ساتر استر

اشوه الدكتور محمد ما يدري اني اقرى بوستك و الا منعنى من دخول مدونتك

حجيه فانكوفر

ترى ثلاث اربع اهل الكويت صار فيهم السكر
خفي علينا اشوي و لاتشهينا
على الحلو

مبروك نيولوك

honey said...

نال على إعجابي الموضوع

ترى مفيد اللي قلتي وايد بس التوقيت غلط أنا ميتة من اليوع و ابي اللي بالصورة إشلون
و الميبل مادري انا دورت فترة ما لقيت يبييه صوغة شكلة لذيييييييييذ

vancouver said...

دللي ومللي


صباحج عسل يا عسل
سامحيني تاخرت عليج بالرد
لاااا شكر على واجب
واجبي اثقف شعوب العالم الثالث
لوووول

العسل مايحب الا العسل
مو غريبه
:)
صاااااااجه الاصلي انطع
ههههه
وماكو على زيت زيتون روما
من ام امه
هههه

اتصدقين انا يبت من ايطاليا
شجيره روز ماري
ههههه
خشيتها بالشنطه بعد ما لفلفتها عدل
مع انه طولها كان نص متر
:)
يبنا اللي اقوى من قنابلج يا دللي
السرساااااااار
لوووول




_------------------------------_





زبوطه

عاد ماااااايبيله شيء
المقادير بالضبط اخذها من كتابي
بس اللي اذكره
3بيضات
تخلطينهم مع كوب حليب
او اكثر شوي
رشه جوزه الطيب
ملح خفيف
وانا احط نقطتين خل عن الزفره
ورشه دارسين مطحون
وتخلطييييينهم عدل
وتغمسين التوست فيهم
تقلينهم بمسحة زيت على التيفال
وياامه ترشينهم بسيرب
او سكر مطحون
والفواكه اللي تحبينهم
واحلىىىى شيء
فريش كريم على جنب
:)

vancouver said...

كويتي بلوغر

الله يعيييييينكم
يالله عشان باجر لما الله يرزقك ببنت الحلال
ما تتعنفق على اكلها
حتى لو زلط
لوووووول

اخذ منه وانا اختك
فاجئ فيه الاهل
بس لا تقولهم شنو اهوه
ودي يشكون فيييييييك
لوووووووول

والله انا اللي سمعته من رفيجتي في نوفاسكوشيا
انه عندهم الالوان شيء خياااااالي
سبحان الله
الظاهر انته صوبهم
بس الله يعينكم كله عواصف وهوااااا


ارق التحايا للساااااحل الشررررقي
ههههههه


عدل يعني وزار زقرتي
ههههه
_------------------------------_



انجنير كويت

شفتها هالبربل
هبه رييييييح
:)))

_-------------------------------_




الدنيا


حبيبتي صبااااااحج عسل
وورد وياسمين

:)

الغرااااامه تعجيزيه وانا اختج
لو قايله شيره لنص البلوغر جان سويتها
بس كلهم لا لا صعبه اوي
:P

vancouver said...

خروفة

حاضر يا قمر

:)

_---------------------------------_


الخيلااااء
الله يازين اللي حضرت
:)

الله مرقوووووووووووووووق
من زماااااان ما اكلته
من اكثر من 4سنين اتصدقين
:(


حياااااج الله بالمزارع
كلها
ترى عندنا مزارع فراوله وتوت وتفاح
وخوخ وكل ما تشتهيه نفسج
:))

_------------------------------_


مانتوفاني
عيونك الحلوه ياخوي

الخلفيات من موقع
pyzam.com
جربه
:))

vancouver said...

عبدالسلاااام
قصدي صقررررررر قريش
هههههه

عادي عادي
شنو يعني نهرب ادمي بجنطه
كلش مافيها شيء
بس عندك واسطه تطلعنا من جوانتانامو
:PPP


_-------------------------------_




بوتشخيييييص

الله يبارك فيك
مشكور ياخوي



_----------------------------_



فراااااااااااااااوله

حبيته قلبي اشلووووونج
؟؟
:**

اشوه انه يازلج البوست
مشكووووووره على طلتج العسل
يا عسل
:)

vancouver said...

حاكي عقالي

يا مرحبا يا مرحبا

د.محمد خل يستريح
السكر الكندي هذا طبيعي
ما يضر الصحة
:)
اقولك عسل الشجر
:))

الله يبارك فيك
منوووووووووور

_------------------------------_



شهد

ياهلا بشهوده
الحمدلله اللي عجبج الموضوع
لالا مو خوش توقيت
انا قايلتلكم من زمان
اكلوا بعدين شوفوا بوستاتي
هههههههه

منووووووووووووره

:)

Anonymous said...

loooooooooooool

maskeen 3thmaaany
el 7amdella 3la salmta :pP

Q80 Blogger said...

انا تعليق رقم 100

طاط طاط

Sara said...

فانكوووووووفر مس يوووو موووت والله :)

هممممممم سلامته عثماني لوول

وبالنسبة للريوووق حدة يشوق بس ناقصه كاكاااااااو :)

والسيرب شايفته بس مادري وين سو خليني أتاكد لج إذا ايفته بالكويت ولا لا ؟

Sara said...

فانكوووفر ليش ما تييبين وكالة عالعسل الكويت وتبيعينه صدقيييني ترانا نمووووت على الدبق وراح نربحج ومالج شغل الدعاية والإعلان علي انا وببلاش بعد :)

Purplecious said...

اش عندج قاعده تفترييييين على البلوقات؟؟؟

هاااااااااا

ما وراج ريل ما وراج ياهل تجابلينا

!!!!!!!!!

فانكوفر احنا الحين عندنا الصبح و توني واصله الدوام.. فمدام انج فاضيه على ما يبدو الله يعافيج سويلي ريووووووووق لأن سال لعابي و انا مجابله بوستج

هههههههههههههههههه
هههههههههههههه

لا تزعلين ام علاوي دا اتشاقى وياج
:********

لوووووووول

فانكوووووووووفر

مادريتييييييييي

خيااااااااانه عظمى

جوووووووووولي

راحت ذاقت شراب القيقب من ورااااااااااااي
!!!!!!!!!!!!

تخيلي
!!!!!!!!!

لالالالالالالا و تقول جني اعرفه جني ذايقته من قبل
:/

خيااااااانه مووووووووو؟

:(((((

خلاص لا تيبينلها قيقب
بس انا قيقبيني

ههههههههههههه
:*

vancouver said...

سيليزيا

لووول
مسيكين هالعثماني
لبس الوزار وقب
ما شفنا الا غبرته
اختفى الولد
لوووووول

_------------------------------_



كويتي بلوغر

طااااااااط طوووط
ههههههه
ما شاءالله عليك
يعني اذا ماكنت حال اول كومنت
لازم تحل الاميه
عط فجه للمعجبين
لوووووووول
تف تف لا احسدك
لووووووووووووووووول

vancouver said...

سارونه
هلا حبيبتي
اشلوووووونج
مس يو تو :**

صاجة الكاكاو ناقص هالمره
شوفي اذا السيرب العادي بتحصلينه بوايد اماكن
بس انا اقصد المابل سيرب

ههههههه
مشكوره على الاقتراح
بس صدقيني كلللللللش انا مالي بهالشغله
:\
ههههه

vancouver said...

بربلووووووووووووشه

اسم الله علي الرحمن الرحيم
تعالي نفخي ببطني
:P

بسم الله من وين طل القمر علي
:)))))

صباحج ورد وعسل وقيقب
هههههه
انا سهراااااااانه
البيت كله نايم
وانا السعلوه اللي قاعده
هههههههههههههه
بعدين اهو تحئيء والا تحئيييء
اخاف تحئييء وانا ما ادري
يبا ماااااا ابي انام
ياختج متحسفة اروح انام
هالساعات ثميييييينه اللي يكون فيها ولدي نايم
عساها نومه العافيه على قلبه
بس ترى صج الهدوء ادوره دواااره
يازين هالطله الحلوه
بس
افا عليج ريوق وغدا وعشا
قريبا ان شاءالله
:)

جولييييييييي
يؤ يؤ يؤ

تتقيقب من وراج
لالا مامعاها حق
انا اقول المره الثانيه تقيقبي معاها والا قوليلها لا تتقيقب
والا تدرين
خلي قيقوبتج من وراها بعد
مثل ماسوت سوي

بس السؤال ويييييييين ذاقته
؟

انزين انتي ما وراج دوام
ولا شغل ? قاعده تتفرفرين بالنت
ماوراج معاش تحللينه
لوووووووووووووول
؟؟

:PPPPPP

Almas said...

الله خوش بوست

يا سلام عالطبق لذيييييذ

والبان كيك غرام غرامي

عجيب

خوش شي

الشق عود said...
This comment has been removed by a blog administrator.
عبثي said...
This comment has been removed by a blog administrator.
kazmawy said...

الصراحة من زمان ما شفت بلوق يونس وغير عن العادة مثل بلوقج ...لما شفت صور الثلج تذكرت ايام فيلجا :)
لوووووول

Anonymous said...

البان كيك و البوليسي في البوست عوار قلب :)

و المرور في مدونتك فعلا يكسر الروتين اليومي للأعصاب المشدودة فأنا أرشح مدونتك لكي تكون إستراحة المدونين

vancouver said...

الماس العزيزه

حياج الله واذا غرامج البان كيك
عيل حياج الله بكندا
نورتيييييي

_--------------------------------_


كظماوي

حياك الله ومشكور على الاطراءالرقيق
:))))
ايام فيلجا مو بس ثلج
امطار وسيول وسنو ودببه قطبيه
كلللللللللللل شيء بفيلجا يا طويل العمر
:))))

vancouver said...

عتيج الصوف

سلامتك من عوار القلب
!
شكرا على المجامله الرقيقة
ادري ليش تبونها استراحة
عشان كل يوم اسويلكم بان كيك
وتبسطون
:))))

SolaimaN said...

شوفي يا اخيتي شلون قوة الباس

:P

هم بعلق هنيه :) ،،لاشك انه راح نفقد حس وطله عزيزه علينا جدا

ومن اهم الزملاء طبعا

انما الدراسة اهم بوااااااااااااااايد وايد

والدعاء انشالله بظهر الغيب يا الغالية

ولد الديرة said...

الله لا يوفقكم ولا يردكم





































الا بالتوفيج المبارك ان شاء الله :P

vancouver said...

اخوي سليمان


وشوووووووف قوه الباس اني هم برد عليك هني
:PPPPPPPP
تسلم وماااااااتقصر
يالغالي
وهذا من طيبك والله
اتمنى ارجع للتدوين واكون بينكم قريبا
انتوا استمرروووووا بالدعاااااء لي
حتى لو اغيب سنه
!
هاهاهاهاها

الله يوفقك ومشكووووووووووووور
على قوه الباس
صج انك نززززغة سليمان
هههههههه

vancouver said...

ولد الدييييييييره


يالمجرررررررررررررم
ههههههه
اول ما قريت الله لا يوفقكم
قممممممممت اححححححححححححك عيوووني
:PP
هاو هاو شمسويتلك
لووووول

بس قلت لا مستحيل بعدين عرفت القمنده
:DDD
امين ياخوي
تسلم على ردك ومؤازرتك
:)

DiLLi O MiLLi said...

يه !! للحيييين أمتحااانااات !!؟؟
شــــخبااارج !!؟؟
صـــقر ولاااا بوحقــــب ؟
:)
عســى بدعتي بالأمتحااانااات
مـــاااانبي ألاااااا
A


مشتــــاااااقييين

:**

فراوله said...

مساالورد والجوري
غاليتي
حتي لو انج مسكره التعليقات
بس هم راح نعلق
الله يوفجج ويكلل مساعيج
بالنجاح
اللهم آمين
لاتطولين علينا
تري بتوحشينا
:**

فراوله said...
This comment has been removed by the author.
Mamloo7a Q8ia said...

:(
ليش يا حاااافظ
انا رجعت وانتي رحتي
يلا الله يوفقج في دراستج ويحقق لج كل اللي تبينه
وترجعين لنا بالسلاااامه
وان شاء الله ما تطولين علينا
ترى بس ولهنااااا وااااايد عليج

SolaimaN said...

قوة حجيه

متى اخر مره سمعتي اغنيه عبدالكريم

((تأخرتي))

:P

charisma said...

عظم الله اجرج يا فانكوفر فى بابا سعد

:(


فاقدينج من غير شر

:(

SolaimaN said...

عظم الله اجرج

Najmah said...

فانكووووووووووووووفر
وييييييييينج
يالله طولللتي
صج صج
ولهااااانة عليييييييج

Mamloo7a Q8ia said...

ولهااااااااااااااااااانين
من الكويت لي فانكووووفر
طولتي الغيبه علينا

Mamloo7a Q8ia said...

فانكوووووفر
وايد طولتي علينا
طمنينا عنج حبيبتي

SolaimaN said...

:(

انشالله انج طيبه ،، ترى طالت السالفه يا اخيتي

DiLLi O MiLLi said...

مصختهاااااا ياااا عنتررررر
كــــــــــــــــل هاااذي غيــــــــــبه !!؟؟
:)

أنا قلت أمر عليج أباركلج بالشهر

مبــــارك عليـــج الشـــــهر
تعودينة أنشاء الله كل سنة وأنت بصحة وسلامة


:*

charisma said...

شلون يعنى بالله بنبارك لج بالشهر
:))

مبارك علييج الشهر يالغاليه
ويا ربى تكونين بالف خير
ومن عوااده
:**